კოპანი (ესპ. Copán) — კოლუმბამდელი ცივილიზაციის ნაქალაქარი ჰონდურასში, მდებარეობს კოპანის დეპარტამენტში, მდინარე კოპანის ხეობაში, გვატემალის საზღვართან ახლოს. დაარსებულია ძვ. წ. I საუკუნეში, დიდების მწვერვალს მიაღწია ახ. წ. VII—VIII საუკუნეებში და წარმოადგენდა მაიას ცივილიზაციის მნიშვნელოვან პოლიტიკურ ცენტრს. კოპანის არქეოლოგიური ტერიტორიის ფართობია 24 კმ². 1980 წლიდან შეტანილია იუნესკოს მსოფლიო მემკვიდრეობის ძეგლების სიაში.