პიარნუ (გერმ. Pernau; ლატ. Pērnava; პოლ. Parnawa; რუს. Пярну, ძველად Пернов) — ქალაქი სამხრეთ-დასავლეთ ესტონეთში, რიგის ყურის (ბალტიის ზღვა) სანაპიროზე.
ქალაქი პიარნუ ესტონეთის ტურისტული ინდუსტრიის ცენტრს წარმოადგენს. იგი ცნობილია ათასგვარი სამკურნალო–განმაჯანსაღებელი, ფიზიოთერაპიული, სარეკრეაციო–თერაპიული ცენტრებით. ამ ცენტრებიდან განსაკუთრებით აღსანიშნავია რანაჰოტელი [სანაპირო სასტუმრო] (1937. არქ. ა. სოანსი და ო. სიინმაა) თავისი ისტორიული მემკვიდრეობით. კერძოდ, ცნობილია, რომ აქ ესტონეთის I რესპუბლიკის (1918–1940) პრეზიდენტები ისვენებდნენ.
მიუხედავად იმისა, რომ ქალაქი XIII საუკუნეში დაარსდა, ყველაზე ძველი შენობა–თეთრი კოშკი XVI საუკუნის დასასრულით თარიღდება. XVII-XVIII საუკუნეების დროინდელი საფორტიფიკაციო ნაგებობებიდან მხოლოდ ბაროკოს სტილის ,,ტალინის კარიბჭე" (1675–1685) და რამდენიმე კოშკია შემორჩენილი.
აღსანიშნავია ბაროკოს სტილის პრტესტანტული და მართლმადიდებლური ტაძრები. ორივე წმ. ელიზაბეთის სახელობის. ქალაქი მდიდარია არტ–ნუვოს და ფუნქციონალისტური სტილის არქიტექტურითაც.