აბუ სიმბალი (არაბ. أبو سنبل ან أبو سمبل) – კლდეში ნაკვეთი ტაძრები (ძვ.წ. XIII ს.) მდინარე ნილოსის მარცხენა ნაპირზე (სამხრ. ეგვიპტე, ძვ. ნუბია). აგებულია რამზეს II–ის დროს. დიდი ტაძარი სამი მთავარი ღმერთისა და ფარაონის სახელობისაა. მის ფასადს ამშვენებს მჯდომარე რამზეს II–ის ოთხი გიგანტური ქანდაკება (სიმაღლე 20 მ), კედლები რელიეფითაა შემკობილი. მცირე ტაძარი ფარაონის მეუღლის ნეფერტარისა და ქალღმერთ ჰატჰორის სახელზეა აგებული. მის ფასადზე რამზეს II–ის და დედოფლის ათმეტრიანი ქანდაკებებია აღმართული. 1968 წელს ასუანის კაშხალის მშენებლობასთან დაკავშირებით აბუ სიმბალის ტერიტორია წყლით დაიფარა, ამიტომ ტაძარი ნაწილებად დახერხეს და უფრო მაღალ ადგილზე გადაიტანეს.
