ცარსკოე სელო (რუს.: Ца́рское Село́; "ცარის სოფელი") — რუსეთის იმპერატორის ოჯახისა და მოწვეულ დიდგვაროვანთა ყოფილი რეზიდენცია 24 კმ-ში სანქტ-პეტერბურგის ცენტრიდან. ამჟამად ქალაქ პუშკინის ნაწილი და მსოფლიოს კულტურული მემკვიდრეობის ძეგლი სანქტ-პეტერბურგის მონუმენტთა ჯგუფთან ერთად.
მე-17 საუკუნეში ეს მამული შვედ დიდგვაროვანს ეკუთვნოდა. მისი თავდაპირველი ფინური სახელი ჩვეულებრივ ითარგმნება როგორც "შემაღლებული მიწა". შესაძლოა ასევე წარმოებული იყოს ფინური სიტყვისგან "საარი" (კუნძული). მე-18 საუკუნეში რუსებმა იგი "სარსკოე სელო"-დ გადააკეთეს, მოგვიანებით კი "ცარსკოე სელო" დაარქვეს.
1708 წელს პეტრე დიდმა ეს მამული მის მეუღლეს - მომავალ იმპერატრიცა ეკატერინე I-ს - აჩუქა. მან კი თავის მხრივ აქ ბლაგოვეშენსკოეს ეკლესია დააფუძნა 1724 წელს და ადგილსაც ბლაგოვეშენსკოე დაარქვა, თუმცა ეს ხელოვნური სახელი ხმარებიდან მალევე გავიდა.