ნიგერი (ფრანგ. Niger, ინგლ. Niger [ˈnaɪdʒər], იორუბა Niger, Ọya) — დასავლეთ აფრიკის მთავარი მდინარე, მისი სიგრძეა 4 180 კმ, ხოლო აუზის მოცულობა 2 118 ათასი კმ², და ამ პარამეტრებით მესამე მდინარეა აფრიკაში ნილოსისა და კონგოს შემდეგ.
მდინარე სათავეს იღებს გვინეაში, შემდეგ მიედინება მალიში, ნიგერში, ბენინის საზღვარზე, შემდეგ კვეთს ნიგერიას და გვინეის ყურეში იღვრება. ნიგერის მთავარი შენაკადებია მილო, ბანი, სოკოტო, კადუნა და ბენუე. მდინარის გვინეის ყურესთან შესართავთან მდებარეობს საზღვაო პორტი ქალაქი პორტ-ჰარკორტი.