ლონხა-დე-ლა-სედა (ესპ. Lonja de la Seda) — გვიანდელი ვალენსიური გოთიკის არქიტექტურის სამოქალაქო შენობა ესპანეთის ქალაქ ვალენსიაში. აშენდა 1482 - 1548 წლებში და დღეს ქალაქის უმთავრეს ტურისტულ ღირსშესანიშნაობას წარმოადგენს. 1996 წელს ის იუნესკომ შეიტანა მსოფლიო მემკვიდრეობის სიაში, როგორც „თვალსაჩინო და უნივერსალური ღირებულების ძეგლი, ერთადერთი ნიმუში გვიანდელი გოთიკის სამოქალაქო ნაგებობისა, რომელიც დრამატულად წარმოაჩენს დიდებული, ძლევამოსილი ხმელთაშუაზღვიური კომერციული ქალაქის ძალაუფლებასა და კეთილდღეობას“.
დღევანდელი ნაგებობის უკან XIV საუკუნის შენობა იდგა, რომელსაც ზეთის გასაცვლელს ეძახდნენ (ესპ. Lonja del Aceite), მიუხედავად სახელისა, ნაგებობა არა მარტო ზეთის, არამედ სხვადსასხვა სახის კომერციული საქმიანობისათვის გამოიყენებოდა.
ვალენსიამ კომერციულ სფეროში აყვავების ხანას XV საუკუნეში მიაღწია, რამაც ახალი შენობების აღმართვას მისცა ბიძგი.
ლონხა-დე-ლა-სედას მონახაზი დამყარებული იყო პალმა-დე-მალიორკაზე მდებარე ანალოგიურ შენობაზე, რომელიც 1448 წელს აიგო.