როპშა (რუს. Ропша) — დაბა რუსეთში, ლენინგრადის ოლქში, როპშის სასოფლო დასახლების ადმინისტრაციული ცენტრი. მდებარეობს მდინარე სტრელკას ნაპირას, ფინეთის ყურის სანაპიროებიდან სამხრეთით 20 კილომეტრში, ხოლო სანქტ-პეტერბურგის სამხრეთ-დასავლეთით 49 კილომეტრში.
თანამედროვე როპშას ადგილას პირველი დასახლებები ჯერ კიდევ ნეოლითის ხანაში (დაახ. 5-6 ათასი წლის წინ) არსებობდა. ეს ტერიტორია დასახლებული იყო ბალტიისპირელ-ფინური წარმოშობის ხალხით: ჩუდები, ვოდები და იჟორები. VIII—IX საუკუნიდან ამ ტერიტორიებზე დასახლდნენ ილმენის სლოვენები. როპშა — ლენინგრადის ოლქის ერთ-ერთი ყველაზე ძველი დასახლებული პუნქტია.
